reforef.ru 1 2 ... 24 25
СТАТУТЪ ВЕЛИКАГО КНЯЗСТВА ЛИТОВСКАГО


ПОЧИНАЮТСЯ ПРИВИЛЕЯ ДО СТАТУ ВЫДАНЫЕ И СПРАВОВАНЫЕ, ГДЂ И ВЪ КОТОРОМЪ МЂСТЂ ПРЕЗЪ ДОЗВОЛЕНЬЕ КОРОЛЯ ЕГО МИЛОСТИ И ПАНОВЪ РАДЪ ИХЪ МИЛОСТИ ЗДЂШНЕГО ПАНСТВА ВЕЛИКАГО КНЯЗСТВА ЛИТОВСКОГО,

Привилей Виленской * року 63.

Во имя Божъе стан се ку вЂчной памети тое то речы, кгдыжъ вси справы съ часомъ съ паметей людскихъ сплывають и въ забытіе приходять, для того то есть вынайдено, абы писмомъ обълснены были ку вЂдомости потомъ будучымъ.

* Має бути «Виленский.»

А про то мы Жыкгимонтъ Августъ, Божъю милостью Король Польскій Великій Князь Литовскій, Рускій, Прускій, Жомоитскій, Мазовецкій, Инъфлянтскій и иныхъ панствъ дЂдичъ, чынимъ знаменито симъ листомъ нашимъ нинЂшнимъ и на потомъ будучымъ, кому будеть потреба того вЂдати. Ижъ кгды есьмо вызвали черезъ листы наши на сеймъ валный, въ столечномъ мЂстЂ нашомъ у Вилни зложоный, пановъ радъ нашихъ духовныхъ и свЂцкихъ, княжатъ и панятъ, врядниковъ помененыхъ, дозволили есьмо и дозволяемъ привилья правъ и волностей земскихъ въ статутъ новописаный вложыти и вписати, по томужъ обычаю якъ въ КоронЂ Польской прывилья и вольности шляхецкіе въ статутъ уписаны суть; за што вси станы, чынечы дяки съ чоломбитьемъ намъ Господарю пану своему прырожоному, донесли намъ въ томъ прозбу свою, ижъ въ тыхъ же привильяхъ земскихъ нЂкоторые артыкулы потребуютъ шыршого объясненья ку латвЂйшому вырозуиЂнью. А въ томъ на первей, яко се стало обдарованье и наданье отъ прадЂда нашого, святое памети славное Якгела Короля Польского наивышшого Великаго Князства Литовского, въ которыхъ то естъ описано: за злученьемъ панствъ подъ онымъ часомъ Коруны Польское зъ Великимъ Князствомъ Литовскимъ, за выданьемъ того жъ прывилья тамъ же въ КорунЂ Польской въ ГородлЂ, ижъ панове шляхта бояре земль нашихъ Литовскихъ дарованьемъ прывильями и наданьемъ имъ данымъ узычонымъ и подаными только повшехное, то естъ соборное вЂры Христіянское къ Рымскому костелу поданыи, мають се тыхъ вольностей веселити и учасниками быти и ужывати, яко панове шляхта Коруны Польское свое вольности держать и ихъ ужывають. А другій артыкуль ижъ на достоенства и преложенства не мають быти обираны, едно если были бы повшехное вЂры Христіянское и подданые Рымскому костелу, а ни тежъ уряды которые земскіе, одно людемъ вЂры Хрестіянское и до радъ нашихъ не мають быти припущоны, а ни въ нихъ бывать, яко жъ послЂ того тотъ прывилей на вольности наданый утверженье дЂда нашого Казимера и стрія Александра и отца нашего Жыкгимонта першого, славное памети Королей Польскихъ и Великихъ Кня-Литовскихъ, и потомъ и наше потверженье тыми жъ словы уписанъ, О чомъ вси одностайнЂ били намъ чоломъ, абыхмо то въ потверженье слушное прыведшы нашимъ листомъ и привильемъ достаточнЂ объяснили. Мы съ паны радами нашими обачившы, ижъ передъ тымъ, нижъ тотъ привилей въ ГородлЂ выданъ, станы а народы шляхецкіе знакомитыми Речы Посполитое и продкомъ нашимъ заслугуючыся значнЂ вывышоны и учтены были, яко то и въ иномъ томъ прывильи на пачатку его меновите описаны, таковые станы на тотъ соймъ до Городна пріЂхали. А къ тому ижъ тежъ бываючы, и не толко Рымского костела послушные, але и Греческого въ лавицы рады продковъ нашихъ и нашое также и иншіе вси станы, на розныхъ службахъ нашихъ бываючы, вЂрность и сталость свою ку службамъ продковъ нашихъ и нашимъ охотнЂ, яко добрымъ и вЂрнымъ подданымъ належыть, завжды и зо всякою сталостью показовали. А такъ уживаючи вси тые зацные слуги, и бачечи же въ томъ привилью нЂкоторому уваженью, хто гербовъ не бралъ, также и тыхъ хто вЂру Греческую держечи, противко продкомъ нашимъ и намъ Господарю вЂрность свою сталЂ показують, одно ижъ на томъ сеймъ не вси были, а звлаща станы Рускихъ земль, про то не уймуючы и ни въ чомъ не нарушаючы оныхъ першихъ привильевъ, отъ продковъ нашихъ и отъ насъ Господаря наданыхъ, але во всемъ при моцы зоставуючи и заховаючи; только тые два члонки и артыкулы вышейописаные объясняючи и ровняючи съ порадою и призволеньемъ пановъ радъ нашихъ духовныхъ и свЂцкихъ уфаляемъ и хочемъ мЂти. Ижъ отъ того часу, не только тые панове шляхта и бояре або потомкове ихъ всихъ земль нашихъ того панства всего нашого дарованья привильевъ и наданье всЂхъ волыюстей и справъ земских уживати и съ нимъ се веселити мають, которые суть подданы Римскому костелу и которихъ тежь продкове клейносты и гербы въ КоронЂ Польской пріймовали; але тежъ и вси иные стану рыцерского шляхецкого, якъ Литовского такъ и Русского народу одно бы были вЂри Хрестіянское, и тежъ которые продкове клеинотовъ або ли гербовъ съ Коруны Польской не брали, однако и заровно того всего вЂчными часы уживати и тыхъ вольностей веселитись, яко перед тымъ здавна и до того часу тыхъ всихъ вольиостей стану рыцерского и шляхецкого обоего народу якъ Литовского такъ и Руского уживали и съ того се веселили. Такъ тежъ и на достоенства и преложенства всякіе и до рады нашое и на уряды земскіе и дворные, не только подданы костелу Римскому отъ того часу обираны и прекладны быти мають, але однако и заровно вси рицерского стану зъ народу шляхецкого люди вЂры Хрестіянское, якъ Литва такъ и Русь, каждый водлЂ заслугъ и годности своее отъ насъ Господаря на мЂстца зацные преложенства зъ ласки нашое браны быти мають. А жаденъ зъ стану рицерского и шляхецкаго зъ стороны закону своего, будучы вЂры Хрестіянское человЂкъ, не маеть быти отъ того отдаленъ и отлучонъ для которыхъ двохъ артыкуловъ и члонковъ въ тыхъ первыхъ привильяхъ описаныхъ. ВЂджо и тое наданье вольностей и правъ земскихъ, у привильи Короля Якгела Князя Витолта сполномъ описаный, поставлено и справлено есть въ КорунЂ Польской такъ, якъ тотъ помененый привилей свЂтчитъ, про то на першомъ близко пришломъ валномъ соймЂ, которій отъ насъ зложонъ естъ, обоимъ тымъ панствамъ Коруны Польской и Великому Князству Литовскому тое поровнанье, будетъ ли потреба еще съ большимъ примноженьемъ волности, иншимъ листомъ нашимъ взновити, за сполнымъ зволеньемъ обоего панства нашего Коруны Польской и Великого Князства Литовского пановъ радъ своихъ станомъ, хочемъ обЂцуемъ не мЂшкаючи а ни уймуючи вжо ни въ чомъ сему листу нашому, и о вшемъ при моцы не порушно зоставуючы его на вЂчные часы. Якожъ на утверженье тое речы печать нашу маестатную казали есьмо привЂсити къ сему нашому листу подписавши его рукою нашою господарскою. При томъ были панове рада наша ихъ милость: Князь Валеріянъ, бискупъ Виленскій; Князь Янушъ Андрошевичъ, бискупъ Луцкій и Берестейскій; Князь Миколай, бискупъ Кіевский; панъ Миколай Радивилъ на ОльсцЂ и Несвижу Княжа, воевода Виленскій, маршалокъ земскій, канцлеръ нашъ наивышшій Великого Князства Литовского, справца староства Жомоитского, державца Кормяловскій; панъ Григорей Ходкевичь, воевода Кіевскій, маршалокъ земли Волынское, староста Володимирскій; Князь Костеитинъ Костентиновичъ Острозскій, воевода Новгородскій; панъ Павелъ Ивановичъ Сапега, воевода Витебскій; Князь Стефанъ Андреевичъ Збаразскій, воевода Подляшскій, староста Менскій, державца Лысаковскій Межирецкій и Винскій; панъ Василей Шишкевичъ, маршалокъ дворный, подскарбій земскій Великого Князства Литовского и писаръ нашъ, староста Могилевскій; панъ Остафей Воловичъ, подчашій нашъ Великого Князства Литовского, староста Дорогицкій; панъ Миколай Кишка съ Техановца, крайчій нашъ Великого Князства Литовского, староста БЂльскій; панъ Щасный Александровичъ Ходкевичъ, столникъ нашъ Великого Князства Литовского, староста Плотельскій, державца Тельшовскій; панъ Янъ Ходкевичъ, староста Житомирский; Князь Романъ θедоровичъ Санкгушковичъ, конюшій нашъ дворный Великого Князства Литовского, староста Мелницкій, державца Кгереноивскій; панъ Ярошъ Корыцкій, подскарбій нашъ дворный Великого Князства Литовского, державца Пунскій и Жижморскій, панъ Станиславъ Захарьяшевичъ Влошинъ, мечникъ нашъ Великого Князства Литовского; панъ Щасный Скрутьевичъ, хоружій зеискій, державца Радунскій; панъ Щасный Герцыкъ, маршалокъ и писаръ нашъ, староста Тикотинскій; панъ Янъ Шимковичъ, писаръ нашъ конюшій Городенскій, державца Ошменскій Вилкейскій и Красносельскій, панъ Янъ Миколаевичъ Гайко, писарь нашъ, державца Марковскій и Мядельскій; панъ Миколай Нарушевичъ, и иные панове маршалки, старостове, державцы и врядники наши земскіе и дворные. Писанъ у Вильни лЂта Божъего нароженья тисеча пять сотъ шестьдесятъ третего, мЂсяца Іюня осмаго дня. Подпись руки господарское, подпись руки пана канцлера.

СТАТУТЪ ВЕЛИКОГО КНЯЗСТВА ЛИТОВСКАГО

Жикгимонтъ Августъ Божъею миллостью Король Польский. Великий Князь Литовскій, Рускій, Прускій, Жомоитскій, Мазовецкій, Ифлянтскій и иныхъ. Чинимъ явно всимъ вобецъ и каждому зособна нинЂшнимъ и на потомъ будучимъ, ижъ тотъ статутъ Великому Князеству Литовскому, панству нашому и всимъ землямъ къ нему прислухаючимъ, упривильеваный въ БЂлску черезъ насъ Господара на соймЂ звыкломъ великомъ валномъ, который зъ стародавныхъ часовъ звыклый бывати въ томъ панст†нашомъ Великомъ Князст†Литовскомъ, зложоный и справленый и постановеный черезъ обранье певное парсуны зъ роду и народу шляхецкого становъ соймомъ належачимъ родичомъ и обывателемъ того Великого Князства, лечъ ижъ ку ужыванью не пришолъ ажъ и до сихъ часовъ не выданъ. Тогды то съ тыхъ прычинъ сталосе, ижъ черезъ насъ и презъ пановъ радъ нашихъ также и всихъ тыхъ становъ Великого Князства Литовского сойму належачыхъ не былъ еще прогляданъ и ревидовань про войну уставичную, которую есьмо вели по вси тые часы зъ Московскимъ, а такъ на теперешнемъ валномъ соймЂ Виленскомъ важными справами затруднени. ВЂдже яко въ часъ мЂлъ знести, видечи быть потребную справедливость всимъ про то съ паны рады нашими и зо всими станы сойму належачыми на поправованье и прегляданье того статуту заседшы и скорикговавшы вже на тотъ часъ на вси потомные часы ку ужыванью, водлугъ привильевъ господарскихъ БЂльского и Виленьского въ тоть статутъ вышей вложоныхъ и описаныхъ, прыложывшы къ нимъ третій прывилей, въ тотъ же статутъ казавшы вписати на поровнанье и объявенье всихъ становъ, ижъ ровно ку достоенствамъ такъ Литовскій яко и Рускій народъ приходити маеть, выдали есмо и выдаемъ, пры бытности и зъ уфалою и позволеньемъ радъ нашихъ и всихъ становъ сойму належачыхъ, всимъ въ посполитость, водле которого вжо вси обыватели того панства нашого Великого Князства Литовского и вси земли ку нему належачіе будуть се радити и судити, поправуючы и прибавляючы водлЂ часу потребы артыкуловъ въ томъ статутЂ на соймехъ валныхъ Великого Князства Литовского, такъ яко около того поправованья артыкуловь шырей доложоно и въ привильи БЂльскомъ. А выдань есть сесь статутъ на соймЂ Виленскомъ великомъ валномъ, року Божъего нароженья тисеча пять сотъ шестдесятъ шостого, мЂсяца Марта, первого дня.


РОЗДЂЛЪ ПЕРВЫЙ О ПЕРСОНЂ ГОСПОДАРСКОЙ

АРТЫКУЛЪ 1.

Вси обыватели Великого Князства Литовского оунымъ правомъ писанымъ и отъ насъ данымъ сужоны быти маютъ.

Напередъ мы Господаръ обЂцуемъ и шлюбуемъ подъ тоюжъ прысегою, которую учинили есьмо всимъ обывателем всихъ земль того панства нашого Великого Князства Литовского, ижъ всихъ княжатъ, пановъ радъ духовныхъ и свЂцкихъ, панов хоруговныхъ, шляхту, мЂста и всихъ подданыхъ нашихъ и всихъ становъ въ томъ панст†нашомъ Великомъ Князст†Литовскомъ, также и земль Русскихъ Кіевское, Жомоитское, Волынское, Подляшское и иныхъ земль прислухаючыхъ къ тому панству нашому, почоншы отъ вышнего стану ажъ и до нижнего, тыми одными правы писаными отъ насъ даными судити исправовати.

АРТЫКУЛЪ 2.

Мы Господаръ обЂцуемъ и шлюбуемъ никого не карати на заочное по данье, хотя бы се дотыкало и о ображенье маестату нашого господарского; и хто тежъ што на кого велъ, а не довелъ, тымъ самъ маетъ каранъ быти.

Тежъ предъречонымъ прелатомъ княжатомъ, понятомъ, паномъ, радамъ духовнымъ и свЂцкимъ, паномъ хоруговнымъ шляхтамъ и мЂстамъ земли Великого Князства Литовского, Руское, Кіевское, Жомоитское, Волынское, Подляшское, Смоленьское, Полоцкое, Витебское, Мстиславское и иныхъ земль Великого Князства Литовского, обЂцуемъ словомъ нашимъ господарскимъ, ижъ надъ жадного человЂка выданье албо осоченье явное таемное и подозрЂнье тыхъ становъ вышеймененыхъ карати не хочемъ ани винити которою кольвекъ виною пенежною, кривавою, везеньемъ, або достоенствъ врядовъ або имЂнья отнятьемъ; нижли ажъ бы первей у суду явным рядомъ и поступомъ права, коли жалобник то есть поводъ и отпоръ обжалованый очивистЂ станутъ, и достаточнЂ на конецъ будутъ поконаны, которые по судЂ и таковомъ поконанью винни, мають быти караны виною у артыкулехъ нижей описаныхъ меновите назначоною. А хто бы тежъ кого колвекъ, обмовляючи вчинилъ къ соромотЂ и зелживости, а шло бы о честь або о горло або о которое кольвекъ скаранье; тогды тоть, хто на кого мовитъ и ведетъ, а не доведетъ, тымъ караньемъ самъ маетъ быти каранъ.


АРТЫКУЛЪ 3.

О ображенье маестату господарского.

О ображенье маестату господарского такъ се разумЂетъ, колибы хто змову албо спикненье албо бунтъ учинилъ на здоровье наше господарское, хотя бы панъ Богъ уховалъ, ижъ бы оная змова не была учынкомъ пополнена; таковый за слушнымъ доводомъ, якъ о томъ нижой описано, честь и горло и имЂнье стратитъ. Тежъ кгды маестатъ нашъ ображонъ бываетъ съ тое причыны, кгды бы хто бунтовалъ покой посполитый врушаючы противъ насъ Господара ку шкодЂ и Речы Посполитое, и мынцу безъ воли нашое билъ явне; а чого Боже уховай на насъ смерти, такъ тежъ и на потомки наши Великіе Князи Литовскіе, по зешстяхъ ихъ хотечы хто осЂсти и опоновати тое панство Великое Князство и Господаремъ быти на немъ, войско людъ служебный сбиралъ и выводилъ; хто бы тежъ зъ непріятелми порозумЂнье мЂлъ, листы до нихъ або послы противъ намъ Господарю и Речы Посполитое або остерегаючы слалъ, тымъ непріятелемъ якуюжъ кольвекъ помочъ давалъ, хотя бы тежъ замокъ нашъ непріятелеви подалъ; хто бы тежъ люди непрыятельскіе въ панство наше Великое Князство Литовское зрадливе привелъ, а то бы на него слушнЂ и справедли†было переведено такимъ же доводомъ, яко нижей описано: таковый с права зъ розсудку нашого съ паны радами нашими Великого Князства Литовского честь горло тратить, и таковаго зрадцы дЂти сынове за таковый выступокъ отца своего безецными будутъ, а имЂнья того зрадцы отчызные выслужоные которымъ кольвекъ обычаемъ набытые мимо дъти и близкіе на насъ Господаря приходять. ВЂдьжо жоны таковыхъ здрайцъ которіе не будуть ли вЂдали тое здрады мужовъ своихъ, а съ того се выведутъ пресегами своими, таковые имЂней своихъ отчызныхъ и матерыстыхъ и вена предъ учынкомъ тое зрады имъ отъ мужей ихъ описаного не тратятъ * але до имЂней отчызныхъ не прійдутъ, хиба по смерти матокъ своихъ только до четвертое части имЂней матерыстыхъ пріходити будуть.

АРТЫКУЛЪ 4.

О ображенье маестату господарского.

Тежъ коли бы хто якого кольвекъ стану былъ найденъ явно подойзреный, ижъ маестатъ нашъ господарскій образилъ, таковому жаденъ привилей ани зацность ани достоенство не маеть помагати ани се имъ щытити можеть, абы се не мЂлъ справовати, и гдЂ будеть правомъ поконанъ, абы не мЂлъ каранъ быти. А хто бы въ часъ ** милуючы пана Бога и пана своего и Речъ Посполитую справедли†перестерегъ або объявилъ, повышенья годенъ будеть. А за обмовенье славною о парсунЂ нашой господарской за доводомъ слушнымъ справа и суду маемъ карати ведлЂ важности выступу и словъ, вЂдже ласкою нашою господарскою, а честью и горломъ ани имЂнья отнятьемъ за то карати не будемъ; вЂдже въ томъ выступЂ коло ображеня маестату нашого господарского, гдЂ кому идеть о честь и о горло, таковыхъ шляхту подданныхъ нашихъ нигдЂ индЂй, одно у здЂшнемъ панст†нашомъ Великомъ Князст†Литовскомъ на соймЂхъ валныхъ тутошнего панства, мы Господаръ съ паны рады нашими судити водлЂ выступку ихъ тымъ каранемъ, яко вышей описано, карати маемъ.


* ЗдЂсь вЂроятно пропущенъ: А дочки тыхъ ачь колвекъ почтивости своее нетратятъ.

** Въ третьей редак. статута прибавлено: «передъ учинкомъ».

АРТЫКУЛЪ 5.

О ображенье маестату господарского такій доводъ, а не инакший маеть быти.

Яко въ кождомъ учынку, за которій гордомъ карають, потреба доводовъ явныхъ и ясныхъ, такъ во ображенью маестату нашого неледа за осоченемъ або вымовеньемъ маемъ се на подданныхъ нашихъ сквапляти; але хто на кого ображене маестату ведеть, маетъ довести свЂдецтвомъ вЂры годными и неподойзреными людми шляхтою и ихъ своею присегою. А если бы хто кого обмовилъ въ томъ учынку, а звлаща ижъ бы на него менилъ, же памъ Господару на здоровье стоялъ або Речъ Посполитую зрадити и ку прудкому упадку привести хотЂлъ, и на тое се важилъ и готовалъ; такій повЂдачъ, если бы такимъ же яснымъ свЂдЂцтвомъ не довелъ, самъ отсуженемъ почтивости и горломъ маеть быти каранъ.



следующая страница >>